Historia e mistershme që rrethon Kishën e Laçit, çfarë u ndodhi 32 ushtarëve që shkuan për ta prishur?

Kisha e “Shna Ndoit” ose siç njihet ndryshe në fjalorin popullor, Kisha e Laçit, është konsideruar për vite me rradhë si një nga vendet më të shenjta në vendin tonë.

Por një histori misterioze e ka rrethuar këtë kishë prej vitit 1981, kohë kur një grup ushtarësh të togës së Drojës në Laç, shkuan për të rrëzuar pjesën e mbetur të kësaj kishe.

Për herë të parë, shembja kishte ndodhur në vitin 1967, kohë kur shteti komunist i asaj kohe i shpalli luftë besimit fetar.

Edhe pse një pjesë e godinës ishte shembur pjesërisht, besimtarët gjatë viteve shkonin ende, gjë që për regjimin ishte një shqetësim. Për këtë motiv, ushtarët morën urdhër të asgjësonin muret, në mënyrë që askujt të mos i shkonte në mend për të bërë pelegrinazh.

Pasi rrëzuan një pjesë të rrethimit, toga prej 32 vetash mbeti e paralizuar nga mesi e poshtë në mënyrë të pashpjegueshme. Disa ushtarë u dërguan nga pushteti popullor i kohës për kurim në Austri, për 6 muaj, ndërsa të tjerët në Spitalin Ushtarak të Tiranës.

Të gjithë mbetën me pasoja, duke u ngritur në këmbë vetëm pas një trajtimi intensiv të gjatë. Fenomeni mbeti i pashpjegueshëm dhe u vesh me mister.

Historia u përhap shpejt në Laç, duke u treguar si diçka mistike. Pushteti i asaj kohe tha se fajin për ngjarjen e pazakontë e kishte ushqimi, si pasojë e një helmimi, po ky fakt nuk u pranua kurrë shkencërisht. Historia është ende e veshur me mister, edhe sot e kësaj dite.

 

Ju mund të pëlqeni dhe këto