Flower
Flower

“Mamin e kisha sëmurë, spitali na kërkonte 3 mijë euro”, rrëfehen gratë që janë burgosur për dr*gë

Numri i femrave që janë prekur nga kultivimi, prodhimi dhe trafikimi i drogës në Shqipëri është rritur ndjeshëm në këto 5 vitet e fundit, ku sipas të dhënave, ato përbëjnë 3% të procedimeve penale.

Të shtyra nga kushtet e rënda ekonomike, 9 nga 60 të dënuarat që vuajnë dënimin në burg për këto vepra penale, janë të moshës 20-30 vjeç, ku kanë sjellë dëshmitë e përfshirjes së tyre në trafik dhe kultivim për “VOA”.

“Jam këtu për drogë. Kam një gocë të vogël, u mundova t’i bëj një jetë më të mirë, s’na eci. Kisha kokainë, do kaloja doganën për në Greqi”.

Kushtet ekonomike shumë të këqija me detyruan të bëja këtë vepër penale. Jetoja me nënën, ka ndërruar jetë tani. Unë 7 rrënjë mbolla, doja të vizitoja nënën time. Vetëm për nënën e bëra”, thotë një 47 vjeçare që kërkoi të mbetej anonim.

“Para disa vitesh pata mamin sëmurë. Kërkoja punë nuk gjeja. Isha 15 vjeç. Spitali kërkonte 3 mijë dollarë. Një ditë fillova të merresha me shpërndarje kokaine dhe heroine. Prap do ta bëja për nënën time edhe po të kthehej koha pas, sepse kemi qenë shumë të varfër”, thotë 30 vjeçarja Sonila Dinoshi.

Avokati Genc Gjokutaj jep një vlerësim të përgjithshëm për këtë gategori grash dhe vajzash të përfshira në trafik dhe kultivim të drogës. “Në një masë dërrmuese këto gra janë të papuna, pa mjete jetese, pa banesë dhe mbi të gjitha pa shpresë”.

Zv. Ministrja e Brendshme Rovena Voda, drejtuese e task forcës kundër kultivimit, prodhimit dhe trafikimit të drogës, thotë se shifrat e proçedimit të grave dhe vajzave për këto vepra penale janë në rënie.

“Këto gra dhe vajza, të përfshira në këtë aktivitet kriminal, janë kategori e dobët, por ka dhe vajza studente, Është një problem shoqëror përfshirja e grave dhe vajzave në këtë veprimtari”.

Mes të denuarve është edhe 23 vjeçarja Redona Demolli. “Unë vazhdoja shkollën e lartë për gjuhë të huaj anglisht, frëngjisht në universitetin e Korçës. Jam zgjuar një mëngjes me gjëra të tjera në mendje dhe gjëja që nuk më kishte shkuar në mendje, ishte që unë do përfundoja në këtë pikë ku jam sot, e denuar nga gjykata 6 vite për trafikim të lëndëve narkotike”.

“Unë isha nisur në një udhëtim në Kroaci. Makina ku unë isha kishte lëndë narkotike, kanabis. S’kisha dijeni”, thotë një 27 vjeçare që kërkoi të mbetej anonim.

“Sigurisht janë kapur shumë, por dhe nga trafikantët është përdorur seksi femër, sepse dhe organet e ndjekjes dhe të zbatimit të ligjit kanë dyshuar tek meshkujt, tek femrat nuk është dyshuar. Femra fatkeqësisht është dhe protagoniste dhe viktimë. Është shtrënguar të hyjë në trafik. Shpesh bëhet marrëveshje, merre ti përsipër se dënohesh më pak, unë dal dhe të ndihmoj dhe ty të dalësh”, sqaron avokati Gjokutaj.

“Unë në fillim e mohova. Nuk tregova që isha me atë, thashë që është e imja, sepse mendova se mund t’ja hidhja më lehtë. Kur e pyetën atë ai tha s’di gjë. Unë, tha ai, nuk kam fare dijeni se çfarë kishte kjo në çantë. Deri në atë moment unë isha duke e mbajtur për vete fajin, duke thënë që është e imja, më pas e ktheva. Është e mija?!!! i thashë atij me nervozizëm- dhe ti nuk dije asgjë!!!. Jo ti e dije i thashë unë dhe ti e kishe. Dhe aty pastaj u implikuam që të dy”, thotë 23 vjeçarja Redona Demolli.

Nga një analizë e statistikave vihet re se në 5 vitet e fundit, numri i grave dhe vajzave është më i lartë në veprën penale të prodhimit të bimeve narkotike, afro 140 të proçeduara. Për avokatin Genc Gjokutaj kjo ka një shpjegim.

“Kanabisi pushtoi vendin. U kthye si kulturë bujqësore. Me kanabisin janë përdorur gjerësisht gratë. Në vjelje, ujitje prashitje, sepse është një bimë që do shërbim dhe kanë jetuar me atë.Madje andej nga Fieri, ai që kishte parcelën u dërgonte katering dhe ushqimin aty në parcelë”.

Gratë dhe vajzat janë parë si kategori vulnerabël, lehtësisht e shfrytëzueshme më pak e atakueshme, e parrezikuar ndoshta dhe kjo ka sjellë më shumë gra në prodhimin e drogës”, thotë Zv. Ministrja e Brendshme Rovena Voda.

Mungesa e shtetit sjell inkriminimin e shtetasit thotë avokat Gjokutaj. Një konstatimi, që zyrtarët i përgjigjen me marrjen e masave për parandalimin e përfshirjes së grave dhe vajzave në kultivim prodhim dhe trafikim, duke ju dhënë mundësi atyre të mos përfundojnë në rrjete kriminale.

“Jemi munduar me Ministrinë e Bujqësisë dhe Ministrinë e Shëndetësisë dhe Mirqenies sociale të krijojmë mundësi për gratë dhe vajzat që janë një kategori e dobet, që do të thotë që janë të papuna, kryefamiljare. Kemi vënë theksin dhe tek pjesa sociale e ketij fenomeni. Po mundohemi të shkëpusim këtë idenë se tashmë mund të mbillet kanabis”, thotë Zv. Ministrja e Brendshme Rovena Voda.

Burimi: VOA

Ju mund të pëlqeni dhe këto