Flower
Flower

Nuk shkarkoi Bushatin, Meta tregon arsyen përse nuk ka dekretuar 5 ministrat e rinj

Ditën e sotme, Presidenti Ilir Meta ka folur në lidhje me mos dekretimin e 5 ministrave të rinj të propozuar nga Rama dhe me faktin se nuk ka shkarkuar ende ministrin e Jashtëm, Ditmir Bushati.

Në lidhje me dekretimin e ministrave, Meta u shpreh se për figurat e reja në politikë po bën verifikimet e nevojshme që të jenë me integritet. Ndërkohë që ka theksuar se nuk do të presi orën e fundit, por do të përgjigjet me dekret sapo të ketë në dorë përgjigjen e kërkuar.

Zoti President, Kushtetuta ju jep një rol një rol të rëndësishëm si pikë reference për politikën e jashtme. Ngurrimi juaj për të mos dekretuar shkarkimin e Bushatit dhe për të mos dekretuar zëvendësimin e tij, a është kjo pjesë e një ridimensionimi të rolit të Presidentit të Republikës në politikën e jashtme të vendit?

Presidenti Meta: “Unë po përmbush të gjitha detyrimet kushtetuese që ka Presidenti i Republikës në këtë rast. Sikurse e keni vënë re, të gjitha propozimet janë konfirmuar menjëherë, që vijnë nga politika, nga Kuvendi, pasi janë përfaqësues, të cilët kanë kaluar disa filtra në të kaluarën përsa i takon integritetit të tyre publik. Për të gjithë emrat e rinj apo figurat e reja që promovohen për ministra, pra që propozohen si të tillë po bëhet detyra normale, me shumë përgjegjësi për verifikimin e integritetit të tyre në mënyrë që të respektojmë institucionin e ministrit, si një institucion shumë të rëndësishëm kushtetues.”

“Kushtetuta thotë: Ministri mishëron cilësitë e deputetit. Kandidati i propozuar për ministër të Jashtëm, si ju rezulton deri tani?”

Presidenti Meta: “Brenda afateve dhe sa më shpejt që të jetë e mundur, jo duke pritur orët e fundit. Por kjo do të varet nga përgjigja e institucioneve që ne u jemi drejtuar. Do të bëjmë të gjitha veprimet përfundimtare dhe publike, me transparencë maksimale.”

Ju mund të pëlqeni dhe këto