I merrnin udhëtarëve 600 euro për teste Covid negative, arrestohen 4 administratorët e agjencive

Katër administratorë të agjencive të udhëtimit janë arrestuar pasi u siguronin udhëtarëve test Covidi me rezultate negative dhe garanci në vendin pritës kundrejt pagesës prej 600 euro.

Katër të arrestuarit e operacionit “Shtegtimi” janë Klotilda Çela, Petrit Cara, Ergys Vejseli dhe Gentiana Konini.

Ata kanë përfituar nga situata e pandemisë, duke shmangur detyrimet tatimore dhe kanë falsifikuar formularë të testit Covid-19. Ndaj tyre rëndojnë akuzat për veprat penale “Mashtrimi”, “Falsifikimi i dokumentave”; “Fshehja e të ardhurave” dhe “Mospagimi i taksave dhe tatimeve”.

Njoftimi i Policisë:

Finalizohet operacioni policor i koduar “Shtegtimi”.
Operacioni i finalizuar nga Seksioni për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë e Rrethit Gjyqësor Tiranë.
Arrestohen në flagrancë 4 shtetas.
Seksioni për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë e Rrethit Gjyqësor Tiranë, bazuar në informacionet e marra në rrugë operative dhe elektronike, ka organizuar dhe finalizuar operacionin policor të koduar “Shtegtimi”, si rezultat i të cilit është bërë arrestimi në flagrancë i shtetasve:
E. V., 34 vjeç, G. K., 44 vjeçe, K. Ç., 32 vjeçe dhe P. C., 37 vjeç, të katërt banues në Tiranë, me aktivitet tregtar biznes privat agjenci udhëtimi.
Këta shtetas, në bashkëpunim me njëri-tjetrin, duke përfituar nga situata e pandemisë ‘’COVID-19’’, nëpërmjet kamuflimit, për t’u mundësuar udhëtarëve të ndryshëm vajtjen në vendet e BE-së, kryesisht në Gjermani, kanë përfituar shumën 600 euro për person, duke shmangur detyrimet tatimore, si dhe kanë falsifikuar formularë të testit ‘’COVID-19’’ dhe garanci të destinacionit të vendit pritës.
Materialet i kaluan Prokurorisë së Rrethit Gjyqësor Tiranë, për veprat penale “Mashtrimi“, “Falsifikimi i dokumenteve”, “Fshehja e të ardhurave” dhe “Mospagimi i taksave dhe tatimeve”.
Ju mund të pëlqeni dhe këto